Адначасова сутыкнуліся аўтобус №100 і тры легкавікі — «Мазда», «Ровэр» і «Поршэ». Кіроўцы атрымалі лёгкія пашкоджаньні. Зь легкавікоў найбольш дасталася «Поршэ».

ДТЗ здарылася на плошчы Перамогі ў раёне кавярні «Салодкі фальварак». Па словах відавочцаў адбылася гэта каля 21-й гадзіны. Спачатку не разьмінуліся аўтобус і «Мазда», якія ехалі ў сустрэчных накірунках – аўтобус з боку вул.Казлова, легкавік, адпаведна, з боку плошчы. Затым у аўтобус ўдарыўся «Поршэ Кайман».

Ад удару ў аўто амаль паадляталі колы. На месца аварыі прыехалі тры брыгады «Хуткай дапамогі». Сабраўся натоўп. Людзі фатаграфавалі бітыя аўтамабілі і пераляканых кіроўцаў.

Уласьнік «порша» нэрвова размахваў рукой зь перавязаным пальцам. Побач усьміхалася дзяўчына, у яе перабінтаванае калена. Некаторыя цікаўныя зьдзекліва пасьміхаліся з гаспадара разьбітага спартовага аўто. Праз колькі хвілінаў ДАІшнікі пачалі адціскаць людзей ад месца здарэньня, не камэнтуючы яго акалічнасьці.

Пад’ехала здымачная група БТ зь Дзянісам Бальшаковым.